یک مقام بلندپایه کشور گفته است که نیازی به حضور مرزبانان روسیه در مرزهای شمالی افغانستان با تاجیکستان وجود ندارد. جنرال باز‌محمد احمدی، معاون وزیر داخله این سخنان را پس از ملاقات خود با جنرال رستم نظراف، رئیس آژانس نظارت بر مواد مخدر تاجیکستان گفت.جنرال احمدی روز ۱۹ اکتبر پس از امضای پروتکل همکاری برای مبارزه با قاچاق مواد مخدر و پریکورسارها میان وزارت کشور افغانستان و آژانس مبارزه با مواد مخدر تاجیکستان با خبرنگاران هم‌صحبت شد.

جنرال احمدی همکاری‌های میان تاجیکستان و افغانستان را در زمینه مبارزه با این روند سودمند و مؤثر ارزیابی کرد. در پاسخ به این سؤال خبرنگاران که آیا به ادعاهای برخی از مقامات روسیه مبنی بر ضرورت بازگشت مرزبانان این کشور برای مراقبت از مرز تاجیکستان با افغانستان گفت: این گونه ضرورت وجود ندارد.

وی افزود: شاید روسها چنین ادعا دارند که مبارزه با قاچاق مواد مخدری که پس از رفتن آنها صورت گرفت، موفق نبوده، اما من این را قبول ندارم. اما مشکل و چالش هنوز وجود دارد. وی تأکید کرد: نیاز به همکاری‌ها با کشورهای دیگر هست، ولی نه به حدی که حضور نظامی داشته باشند.

جنرال احمدی گفت که هر دو کشور، تاجیکستان و افغانستان به کمک‌های فنی، مالی و آوموزشی در سمت بالا بردن ظرفیتهای مراقبت از مرز نیاز دارند.

اما مقامات مختلف دولت روسیه طی ماه‌های اخیر در موارد مختلف مرز میان تاجیکستان و افغانستان را مرزهای جنوبی کشورهای مشترک‌المنافع خوانده، ادعا کرده‌اند که تاجیکستان از عهده مراقبت از این مرز به تنهایی بر نمی آید و موضوع بازگشت مرزبانان روس را به تاجیکستان مطرح کرده‌اند.

رسانه‌های تاجیکستان و روسیه در این زمینه مقالات و گزارش‌های زیادی نوشته بودند، چیزی که پیوسته توسط مقامات تاجیکستان انکار شده است.
(بی بی سی)